O venres 3 de outubro, ás 20:00 horas, terá lugar na sala do Ateneo Santa Cecilia a inauguración da exposición Lendas de Galicia, do pintor e artesán ferrolán Pedro Castro Couto, coñecido artisticamente como Perico Castro.
A entrada ao evento será libre ata completar o aforo.
A mostra reúne unha escolma de obras nas que o artista afonda na tradición cultural galega e europea a través da pintura.
Inspirado por lendas, simboloxía celta e motivos medievais, Castro presenta unha serie de cadros onde conflúen historia, imaxinación e cor.
Con formación na escola Mestre Mateo da Coruña e unha sólida traxectoria no ámbito da arte e a reprodución arqueolóxica, Perico Castro ten exposto en numerosos museos galegos e do resto do Estado.
Na súa obra pictórica utiliza técnicas como o óleo, o acrílico e a plumilla, esta última destacando polo detallismo co que representa igrexas e monumentos galegos.
As súas creacións, marcadas pola influencia da historia e da arqueoloxía, abarcan diferentes épocas como a cultura castrexa, a greco-romana ou a medieval, sen esquecer temas actuais.
Nos últimos anos, centrouse en obras de forte carga simbólica e visual, con cores vivas e perspectivas intuitivas que dotan ás escenas dunha notable profundidade.
A exposición poderá visitarse ata o 15 de outubro, de luns a venres, en horario de 18:00 a 20:30 horas.