A actividade nas aulas vai chegando ao seu descanso e 'A familia Xachoconto' tamén dá por finalizadas as sesións escolares deste curso lectivo. Unha proposta de PontevedraViva e PontevedraViva Radio para o fomento do hábito lector entre alumnado de Primaria e Secundaria e de achegamento aos medios de comunicación dixitais.
A última das visitas que deixa o seu nome corresponde aos estudantes do CEIP San Xoán Bautista de Cercedo Cotobade, co que participaron quince nenas e nenos de 4º, 5º e 6º curso de Primaria.
Achegáronse ao xornalismo local desde a redacción de PontevedraViva e ao medio radiofónico desde o estudo de PontevedraViva Radio onde gravaron o podcast que está dispoñible para escoita e descarga.
Para achegarse ás letras, concretamente ás Letras Galegas, expúxoselles a sinalada data do 17 de maio: que se celebra, por que, ou quen foi a primeira autora homenaxeada.
Para achegalos á autora de 'Cantares galegos', realizaron un percorrido virtual pola Casa Museo de Rosalía de Castro en Padrón. Coñeceron algúns dos emprazamentos onde escribía, ao seu marido Manuel Murguía, a descendencia da parella, a cociña coa súa lareira, ou o dormitorio no que faleceu.
De maneira máis lúdica foi o achegamento á escritora homenaxeada este 2026, Begoña Caamaño, mediante varios xogos interactivos.
Durante cinco meses, foron catorce visitas as realizadas; case trescentos alumnos de todos os ciclos de Primaria e de Secundaria, de diferentes municipios da provincia como O Grove, Cambados, Cerdedo-Cotobade, A Lama, así como CEIPs da zona urbana e as parroquias da capital.
As Letras Galegas, con Begoña Caamaño en gran medida, estiveron presentes en practicamente todas as sesións; tamén se achegaron á Xeración do 27 a través de Federico García Lorca, así como a outros autores de literatura infantil e xuvenil.
