Este luns 15 de setembro, ás 18,00 horas, resolverase o misterio. Vaise coñecer a segunda persoa que presentará a gala dos premios Feroz 2026 en Pontevedra.
Será no Teatro Principal, nun acto para o que ainda se poden retirar entradas. Para poder acceder, poden recollerse as invitacións na caseta de turismo de Montero Ríos.
Ata o momento, xa entregaron arredor de 220 convites a persoas interesadas.
As persoas asistentes poderán participar nunha charla-coloquio coa persoa escollida, un dos segredos mellor gardados da presente edición, pois só se coñece a primeira presentadora, Samantha Hudson.
Con esta presentación arranca a programación previa dos Premios Feroz 2026 que chega á cidade "con moita ilusión", en palabras da concelleira de Promoción da cidade, Anabel Gulías.
A concelleira pretende que os protagonistas dos premios Feroz volvan a ser os pontevedreses e pontevedresas que en 2024 acompañaron a toda a programación durante catro meses de proxeccións, debates, mesas redondas, clases maxistrais...
Anabel Gulías lembra que quen desexe seguir gozando do mellor cinema e das series de TV máis actuais, ainda pode retirar a súa entrada de balde na caseta de turismo de Montero Ríos.