Se Emilia Pardo Bazán e Benito Pérez Galdós vivisen nesta década do XXI estarían a facer sexting?. O fogoso intercambio epistolar que os dous soados autores mantiveron lévase estes días ao cinema. A produtora galega Agallas Films e a canaria Jugoplastika están en plena rodaxe contando coa dirección de Paula Cons Varela.
Aténdenos para falar no podcast 'Cara a cara' antes de comezar sesión nas Illas Canarias. A primeira semana desenvolveuse en emprazamentos de Madrid e estes días continúan no arquipélago canario que "arquitectónicamente é brutal e ten unhas localizacións que son unha pasada", comenta esta directora. Unha rodaxe que se prolongará en total durante catro semanas.
"Unha película absolutamente contemporánea, aínda que estea ambientada entre 1887 e 1889, porque creo que todos os conflitos que viven e como os viven, a paixón, a sexualidade, faise absolutamente contemporáneo e mesmo un exemplo para os homes e mulleres de hoxe en día", explica.
A actriz galega Lucía Veiga interpreta a Pardo Bazán, mentres que o actor canario Paco Déniz dá a réplica a Pérez Galdós. Conta con colaboración da TVG así como da televisión pública e institucións canarias. Este é momento de rodaxe e Paula Cons agarda promocionar 'O meu ilustrísimo amigo' en 2025.
O podcast está dispoñible para reprodución e descarga en PontevedraViva Radio e igualmente pódese escoitar na ligazón que se adxunta.