Les Poubelles, Ornitorrincos, Malo Será, Vermes, Rek y Simpsonhead son os seis proxectos que se consolidan na quinta edición de Xeración Sónica.
Trátase do proxecto anual que promove a Concellería de Xuventude do Concello de Pontevedra e a través do cal, mozos e mozas da cidade únense en equipos creativos que dan lugar a formacións artísticas como as sinaladas.
Estas formacións artísticas comezan a dar os seus primeiros pasos; isto é, a identificarse como banda, cun estilo e crear as súas primeiras cancións, coa tutela de tres monitores: Gonzalo Maceira, Violeta Mosquera e Alejandro Alonso.
Ademais, realizan os seus primeiros directos grazas a iniciativas culturais que tamén se promocionan desde a cidade como o Surfing the Lérez, o Galegote Rock, Músicas nas Letras, etc... ou de colaboracións xa consolidadas con iniciativas doutros lugares como polo exemplo a Escola de Rock de Paredes de Coura.
PontevedraViva Radio visibiliza o traballo que alumnos e titores desenvolven no Local de Música de Pontevedra.
Nos capítulos dos podcast Xeración Sónica iranse coñecendo as inquietudes artísticas, aprendizaxe e experiencias destas promesas pontevedresas; así como os puntos de partida e obxectivos que se van cumprindo e que explican os adultos do proxecto.
Semanalmente, os venres ás 18.00 horas emitirase cada episodio no streaming que poderá escoitarse e descargar unha vez finalizado o programa desde a web de PontevedraViva Radio.