'O sexo na arte e a cultura medieval' é a nova proposta académica da UNED para este verán, na que se abordará como se representou a sexualidade na arte da Idade Media e que relación tivo coa moral, a relixión e a sociedade da época.
A actividade celebrarase do 13 ao 15 de xullo no Centro Asociado da UNED en Pontevedra e poderá seguirse de forma presencial ou online, en directo ou en diferido.
Dirixido pola catedrática de Historia da arte da UNED Inés Monteira Arias e coordinado polo profesor da Universidade de Barcelona Juan Antonio Olañeta, o curso reunirá a especialistas de distintas universidades e institucións nacionais e internacionais para ofrecer unha visión ampla e sobre un tema pouco habitual na divulgación do patrimonio medieval.
Ao longo de tres xornadas, o programa analizará a iconografía sexual presente en igrexas románicas, manuscritos e sillerías corais, así como a concepción cristiá do pecado e a sexualidade, a influencia da moral relixiosa nas representacións artísticas e a percepción social de prácticas como o adulterio, a prostitución, a homosexualidade ou o incesto na Idade Media.
Tamén se estudarán fontes medievais para comprender o significado das imaxes máis aló dos tópicos e as interpretacións sensacionalistas.
O equipo docente estará formado por especialistas como Milagros Guardia Pons (Universidade de Barcelona), Raphaël Guesuraga-Trueba, María Jesús Fuente Pérez (Universidade Carlos III de Madrid), Victoriano Nodar Fernández (Universidade de Vigo), Abel de Lorenzo Rodríguez (Universidade de Edimburgo e Universidade de Santiago de Compostela) e María Dolores Teijeira Pablos (Universidade de León), ademais da directora e o coordinador do curso.
A proposta está dirixida especialmente a estudantes universitarios, investigadores, docentes e profesionais vinculados ao patrimonio, a historia, a arqueoloxía, a historia da arte e a xestión cultural, aínda que tamén está aberta a calquera persoa interesada no tema.
O curso forma parte da 37ª edición dos Cursos de Verán da UNED, ten unha duración de 20 horas e conta con recoñecemento dun crédito ECTS.