O Samaín de Barro volve celebrarse cunha cita de ficción fílmica grazas á organización do Festival de Curtas D-Medo.
Ata o mércores 18 de outubro pódense presentar os traballos, que deben durar un máximo de tres minutos e utilizar unha temática vinculada ao día do Samaín. O enfoque do proxecto, o xénero e o número de personaxes é libre.
Todas as bases do concurso pódense consultar na oficina da OMIX de Barro ou na web do Concello.
Establécense tres premios. O primeiro consiste en 200 euros. Tamén se establece un premio do público cun vale de 60 euros e outro para estudantes de Ensino Secundario, tamén dotado cun vale de gasto pola mesma cantidade.
O martes 31 de outubro van proxectarse as curtas nunha gala final na que se entregarán os premios, segundo informa o Concello.
A actividade forma parte do programa Dándolle á lingua 2023, promovido pola Deputación de Pontevedra coa intención de dinamizar a lingua galega.