Despois dunha semana de intensa actividade, o festival Sete Falares despediuse da súa décima edición, celebrada nun enclave privilexiado como é a igrexa de Santa Clara.
Unha gala de clausura puxo fin este sábado a sete xornadas de narración oral nunha programación que contou con nove contadores de historias con eventos dirixidos a público familiar e adulto.
A última xornada de Sete Falares comezou cedo, cunha sesión vermú no claustro de Santa Clara a cargo do cántabro Alberto Sebastián, e tivo continuidade xa de tarde ás 19.00 horas con Mohamed Hammú.
Foi un aperitivo á gala de clausura, na que participaron, ademais dos dous narradores anteriores, Fernando Guerreiro, María da Pontragha, Paula Carballeira e Pavís Pavós.