O Pazo da Cultura de Pontevedra converterase o vindeiro mércores, 27 de maio, no escenario da gala de entrega da décimo terceira edición dos Premios Martín Códax da Música.
O evento, promovido pola asociación Músicas ao Vivo, foi presentado este venres de xeito oficial no consistorio pontevedrés, nun acto que serviu para desvelar as claves artísticas dunha noite que xogará co simbolismo do número 13 e que renderá tributo á traxectoria da mítica banda de rock ourensá Los Suaves co galardón honorífico deste ano.
A cita, que contará con 48 proxectos finalistas distribuídos en 15 categorías musicais diferentes, chega á súa recta final cunha alta participación, despois de rexistrar arredor de 450 inscricións nas distintas modalidades en activo durante este ano 2026.
A presentación institucional contou coa presenza de representantes municipais, provinciais e da firma patrocinadora.
Durante a súa intervención, Pablo Buján, director comercial de Bodegas Martín Códax, quixo lembrar a evolución que tivo este certame ao longo do tempo. "Vimos nacer e medrar estes premios, e para a nosa firma supón unha data fundamental no calendario", apuntou Pablo Buján.
O director comercial salientou ademais a implicación do Concello de Pontevedra e da Deputación Provincial á hora de facilitar espazos públicos idóneos e de achegar a actividade cultural directamente á cidadanía.
Pola súa parte, o concelleiro de Cultura de Pontevedra, Demetrio Gómez, amosou o orgullo municipal por albergar unha nova edición dun certame que pon en valor a pluralidade da escena galega, sinalando que o territorio posúe unha gran riqueza de xéneros e estilos.
Na mesma liña, o vicepresidente da Deputación de Pontevedra, Rafa Domínguez, reiterou o apoio da institución provincial ao evento e louvou a calidade crecente das propostas que aspiran aos galardóns.
A organización detallou que a temática xirará arredor das lendas e o patrimonio inmaterial de Galicia. A presidenta de Músicas ao Vivo, Sheila Patricia, explicou que para esta ocasión quixeron darlle a volta á connotación habitual do número trece.
"Queriamos xogar co número 13 e a gala vai tratar sobre supersticións, rituais, sacar o meigallo e dar a viravolta a esa cifra", explicou Sheila Patricia. A presidenta da asociación engadiu que esta edición supón o último ano de traballo da actual xunta directiva do colectivo.
A posta en escena correrá a cargo do escenógrafo Diego Valeiras, quen avanzou que o auditorio do Pazo da Cultura se transformará nunha paisaxe mística marcada polas árbores, o sfumato e as néboas, empregando materiais puros para recrear o territorio.
A dirección musical do evento estará coordinada por Tero Rodríguez e contará cunha dobre proposta sonora coordinada polos músicos Pla Vinseiro e Cristian Durán.
Esta combinación incluirá as actuacións de Laura LaMontagne e a Orquestra NeverLoura, co obxectivo de xerar un contraste entre a solemnidade mística e o estilo tradicional das formacións de verbena.
O proceso de elección atópase na súa última fase. Tras a selección previa do xurado profesional, composto nesta edición pola pianista María Domínguez, a artista Blanca Pereira, o guitarrista Isidro Otero, o xornalista Luis Pardo e a xestora Marta Horjales, o público xeral e os asociados teñen a oportunidade de votar polos seus proxectos favoritos a través da web oficial ata este domingo 24 de maio.
O sufraxio popular achegará o 50% da puntuación final.
Desde a organización lembraron que, aínda que o aforo está próximo a completarse, aínda quedan algúns convites dispoñibles para asistir á entrega, que tamén se poderá seguir por streaming na plataforma agalega.gal e nas redes da asociación.
Un dos grandes atractivos desta edición é a entrega do Premio de Honra a Los Suaves.
A banda liderada por Yosi Domínguez sucede no palmarés a outras figuras históricas como Luz Casal, Emilio Cao ou Leilía.
Desde Músicas ao Vivo remarcaron que o recoñecemento á formación ourensá, autora de traballos emblemáticos como Malas noticias ou Santa Compaña, xa está a espertar un notable interese en publicacións musicais especializadas de todo o Estado, grazas ao impacto social, cultural e emocional que o seu rock urbano tivo dentro e fóra das fronteiras galegas durante máis de trinta anos de traxectoria.
Engade Pontevedra Viva como fonte preferida de Google de balde
Mantente informado coas últimas noticias de actualidade.