Teatro espontáneo o xoves 25 de abril no Mercado de Pontevedra

Pontevedra
15 de abril 2024
Actualizado: 30 de setembro

Liberdade, creatividade e convivencia danse a man no Teatro espontáneo, unha iniciativa promovida polo Concello de Pontevedra, en colaboración coa asociación Inzar, posta en marcha o pasado febreiro co fin de xerar espazos de encontro, de reflexión e crecemento persoal, social e comunitario

Mercado municipal na rúa Serra
Mercado municipal na rúa Serra / Mónica Patxot

Liberdade, creatividade e convivencia danse a man no Teatro espontáneo, unha iniciativa promovida polo Concello de Pontevedra, en colaboración coa asociación Inzar, posta en marcha o pasado febreiro co fin de xerar espazos de encontro, de reflexión e crecemento persoal, social e comunitario.

Este obradoiro é unha actividade mensual que se desenvolve en dúas sesións de hora e media, en dous xoves consecutivos.

O terceiro xoves de cada mes, neste caso o día 18 de abril, celébrase unha sesión de adestramento en técnicas de escenificación, improvisación e teatro espontáneo na Casa Azul, en horario de 19.30 a 21.30 horas. É unha actividade aberta polo que para participar só hai que acudir, non é necesario inscribirse.

Unha semana máis tarde, o cuarto xoves de abril o día 25, o Mercado acolle unha representación pública deste teatro de improvisación, en horario de 20.00 a 21.30 horas. 

Trátase dunha interpretación sen guión previo, no que os actores e público constrúen un relato colectivo.

O Teatro espontáneo busca crear condicións para que as persoas poidan expresarse con liberdade, dicir o que queiran, reflexionar sobre os temas que lle interesan ou inquietan, debater sen confrontación, buscar respostas e transitar cara a unha creación colectiva.

Malia non ser -en termos rigorosos- un produto artístico nin un recurso terapéutico, o teatro espontáneo é unha ferramenta de resolución de conflitos, unha intervención social que fomenta o diálogo social respectando a diversidade, fortalece o desenvolvemento humano e a conciencia cívica, ademais de incentivar a participación social activa.