Teatro, poesía e monicreques para aprender a voar en liberdade

O auditorio de Afundación de Pontevedra acolle durante estes días unha nova cita coas artes escénicas dirixida ao público máis novo.

Trátase dunha proposta pensada para escolares de Educación Infantil que combina emoción, aprendizaxe e creatividade.

A obra elixida foi Vuelapluma, unha produción de Periferia Teatro que chega tras o recoñecemento obtido pola compañía en distintos festivais nacionais e internacionais.

As funcións arrincaron con dous pases matinais e continúan este mércores e os próximos días 9 e 10 de abril.

En total, preto de 2.800 alumnos procedentes de 56 centros educativos de Pontevedra e a súa contorna pasarán polo auditorio para gozar do espectáculo.

Vuelapluma pon en escena a historia dun paxaro que, tras pasar toda a súa vida nunha gaiola, descobre por primeira vez a liberdade de voar.

A través dunha coidada posta en escena que mestura monicreques, música e unha forte carga de poesía visual, a obra convida aos máis pequenos a reflexionar sobre valores como a liberdade, o respecto, o crecemento persoal ou a relación coa natureza.

Esta iniciativa forma parte do programa educativo que Afundación desenvolve cada curso co obxectivo de complementar a formación nas aulas. Dentro desta oferta, as artes escénicas ocupan un lugar destacado pola súa capacidade para estimular a observación, fomentar o diálogo e potenciar habilidades sociais.

A proposta busca, ademais, reforzar competencias como a creatividade, a autonomía, a autoestima ou o traballo en equipo, alicerces fundamentais no desenvolvemento integral do alumnado.