Segunda cita co ciclo "Mulleres". Será este luns 28 de marzo, a partir das 19:30 horas, coa proxección da película estadounidense Unha cuestión de xénero.
Dirixida por Mimi Leder en 2018, a actriz Felicity Jones (A teoría do todo) protagoniza este "biopic" sobre Ruth Bader Ginsburg, xuíza do Tribunal Supremo dos Estados Unidos, a segunda muller na historia que serviu neste alto órgano xudicial.
Ginsburg foi nomeada para o alto tribunal en 1993 polo presidente Bill Clinton e cambiou o curso da historia cun singular caso sobre discriminación de xénero que abriu o camiño para a igualdade nos tribunais.
A película proxectarase na sede de Afundación de Pontevedra con subtítulos para que as persoas xordas poidan gozar da historia.
"Mulleres" é un ciclo formado por filmes nas que as mulleres son as protagonistas e nas que se tratan temas como a reivindicación de dereitos, a soidade ou o traballo digno. Trátase pois dunha oferta que ten como eixo vertebrador o empoderamento das mulleres.
Esta actividade enmárcase na iniciativa solidaria Cultura por alimentos que Afundación impulsa xunto á Federación Española de Bancos de Alimentos.
O acceso a cada unha das sesións será a cambio da entrega de alimentos de primeira necesidade que serán entregados posteriormente aos bancos de alimentos locais.