O Teatro Principal de Pontevedra converterase este venres 13 de febreiro no escenario principal para a nova xeración de música nova da cidade.
A partir das 20:00 horas, coas portas abertas desde as 19:45, o público poderá gozar dun concerto exhaustivo que reúne a once formacións locais, organizado pola Concellaría de Xuventude, Xeración Sónica e Artecalavera.
O evento servirá como escaparate final para as bandas desta edición de Xeración Sónica, o proxecto de creación musical impulsado para rapaces e rapazas de entre 13 e 16 anos.
Subirán ao escenario Ex1t, I am plyx, Zona 5, Básica, Ghaleo e Vexx. Ademais, a edición contará coa participación de Rager, banda formada en edicións anteriores que amosa xa un estado de profesionalización, e de dous grupos procedentes do Local de Música: Ape Habit e Pedido 751.
A xornada terá un inicio especial da man de A Banda do Rocklab, formada por integrantes de 12 anos vinculados ao Pazo da Cultura e ao Salón do Libro, sendo os máis novos da cita.
A representación artística complétase coa estrea de "Elas non calaron", a nova canción de Memoria de Elefanta, o proxecto educativo sobre memoria histórica.
A cita musical tamén será o marco para a presentación do recompilatorio X-Sónica, vol.7, que estará dispoñible en plataformas dixitais desde ese mesmo día.
En total, rapaces e rapazas de entre 12 e 20 anos presentarán cancións orixinais en galego compostas por eles mesmos.
A entrada é completamente de balde.
Engade Pontevedra Viva como fonte preferida de Google de balde
Mantente informado coas últimas noticias de actualidade.