A Deputación de Pontevedra, a través do Museo, pon en marcha unha nova edición do seu exitoso curso "Tirando do fío".
Nesta ocasión, a iniciativa mergullarase na fascinante historia da moda do século XIX, analizando a súa conexión coa historia e a arte da época.
O curso, que xa en 2024 abordou a moda desde o Antigo Exipto ata o século XVIII, centrarase agora no período comprendido entre a Revolución Francesa e a Belle Époque.
A experta Carolina Munáiz será a encargada de impartir estas oito sesións, que terán lugar todos os mércores ás 19:00 horas no Edificio Castelao do Museo, comezando o 22 de outubro e finalizando o 17 de decembro.
"O curso aproxímase aos cambios históricos substanciais do século XIX e a consecuente evolución dos valores do traxe europeo", explica Carolina Munáiz, destacando o impacto da Revolución Francesa e a industrialización nas transformacións sociopolíticas e, por ende, na indumentaria.
As sesións explorarán temas como os cambios na moda provocados pola caída do Antigo Réxime e o ascenso da burguesía, a influencia de movementos artísticos como o realismo e o impresionismo, e a irrupción dos grandes almacéns e as revistas de moda.
Tamén se afondará na relevancia de figuras como Amelia Bloomer, Charles Frederick Worth e Florence Wallas Pomeroy.
O curso é de acceso libre para todas as persoas interesadas. Aqueles participantes que desexen obter un certificado de asistencia deberán inscribirse previamente a través do correo electrónico [email protected] e asistir a un mínimo do 70% das sesións. Cada encontro terá unha duración dunha hora e media.
Carolina Munáiz é docente na Escola Superior de Deseño de Moda Formarte da Coruña, titulada en Ilustración e con formación na Escola de Canteiros de Pontevedra. Compaxina a súa labor educativa coa súa faceta como pintora.