As Festas de Verán de Pontevedra, cuxa programación completa se presentou este martes, volverán reservar un espazo para propostas lúdicas pensadas para o público familiar, entre elas os ciclos Titirivedra, Itineranta e Animatrón, que regresarán con novas propostas.
Dentro desta programación festiva e cultural abrirá fogo o ciclo de monicreques Titirivedra, que se celebrará en diferentes espazos urbanos entre os días 14 e 19 de xullo.
Haberá dúas sesións o luns 14 con Mamulengo Capiroto de Lafontana Formas Animadas (19:00 horas, Alameda) e Trigedias de Amor e Cornos de Teatro Arbolé (22:00 horas, Praza do Teucro);.
Dobre será tamén a xornada do martes 15 con Palhinhas a História de um Espantalho de Krisálida Teatro (19:00 horas, Alameda) e O Ferreiro e o Diaño de Monicreques Alakrán (22:00 horas, Praza do Teucro).
O resto será A Cuba de Monicreques Alakrán (mércores 16), A Toupiña que quería saber quen lle fixera iso na cabeza da Xanela do Maxín (xoves 17), The Piccole Theatre de Trécola (venres 18) e Pinocho de Monicreques Cachirulo (sábado 19), todas elas na Alameda ás 19:00 horas.
De 16 ao 18 de xullo celebrarase a décimo cuarta edición de Itineranta, o Festival Internacional de Animación de Rúa de Pontevedra, no que participarán nove compañías de todo o Estado, que presentarán os seus espectáculos polas prazas e rúas do centro histórico.
Los Aguadores de Almozandia Teatro, Tchimizaguayas de Tchyminigagua e Aliens Foc de Produccións Scura serán o tres espectáculos que se poderán ver o mércores 16.
O xoves 17 será a quenda de Very Big Pulga de Asaco Producións & Cirko Psikario, Diminuts de La Fam e Pachamama de Troula.
Olympics de Nacho Vilar Producciones & Yllana, Disko Funk de K de Rúa, Merograde de Brincadeira e Quimera de La Fam serán as propostas do venres 18.
E o parque das Palmeiras, pola súa banda, volverá ser o escenario dunha nova edición de Animatrón, unha proposta de obradoiros e actividades infantís que as Festas de Verán de Pontevedra ofrecerán entre os días 29 de xullo e 1 de agosto.
Haberá seis talleres diferentes, que se irán alternando a diario, un obradoiro especial de maquillaxe, unha actuación musical cada día e moita animación con zancudos, monociclos, malabares ou globos xigantes, entre ptras actividades.
Ademais, o Animatrón ofrecerá unha ludoteca para os máis pequenos con pezas xigantes tipo Lego, chalecos e cascos de obra; e un xardín infantil, no que poder experimentar como traballa un xardineiro entre apeiros de labranza, flores, hortas ou carretillas.
A estas tres propostas unirase, dentro desta mesma oferta lúdica, o ciclo Cinema e Estrelas, que volverá converter a Praza da Pedreira nunha sala de cine ao aire libre entre os días 8 e 12 de xullo, coa proxección dunha película cada noite ás 23:00 horas.
Nesta ocasión serán os filmes Flow, un mundo que salvar (martes 8), Bird (mércores 9), Crossing (xoves 10), Unha historia verdadeira (venres 11) e Os paxaros (sábado 12).