O presidente da Deputación de Pontevedra recibiu este venres no pazo provincial aos responsables dos 12 equipos de fútbol federados e de veteranos que poderán adestrar e xogar nas instalacións deportivas do Centro Príncipe Felipe durante a temporada 2015-2016.
En base aos resultados da convocatoria publicada o pasado mes de xaneiro, os seis clubs de fútbol federados beneficiarios son: Pontevedra C.F, Salgueiriños C.F, A.X. de Lérez, S.D.C Salcedo, Bora C.F e A.D Sagrado Corazón. O C.D Burgo, Peñabora, Mourente, S.C.D Mourente, A Santiña e Club Centro son os seis equipos de veteranos que tamén empregarán os campos de Príncipe Felipe.
O uso das instalacións prolongarase ao longo de todo o ano, salvo o mes de xullo. O horario para o uso público será de luns a venres desde as 16:00 ata as 23:30 h e os sábados e domingos de 9:00 a 14:00 h e de 16:00 a 22:00 h.
Todos os usuarios das instalacións deportivas deberán facer un uso persoal das instalacións que foron obxecto de reserva ou inscrición, respectando a normativa específica establecida polo Centro Príncipe Felipe.
A Deputación ven de realizar diversas obras de mellora no recinto deportivo. Colocáronse porterías, dúas bancadas de 8 prazas, un marcador electrónico, unha rede de drenaxe, unha varanda perimetral de alumnio e redes de nylon para evitar a perda de balóns. Asimesmo tamén se instalaron máis de 7.000 metros cadrados de céspede artificial, marcouse un campo de fútbol 11 e dous de fútbol 7.