A derrota ante o Cangas no Pavillón Municipal dos Deportes, que impediu conseguir polo momento a permanencia matemática na Liga Asobal, deixou ademais unha consecuencia desagradable para a Sociedade Deportiva Teucro en forma de ameazas e insultos nas redes sociais.
En concreto, o club fixo público o comentario dun usuario da rede Facebook que chegou a desexar a morte dos xogadores acusándoos de ter vendido o encontro.
"Ojalá se estrelle vuestro próximo avión", chegaba a comentar este usuario no seu comentario ao Teucro.
Ante esta situación a xunta directiva teucrista reuniuse a última hora do martes e acordou presentar unha denuncia ante as autoridades competentes "ao considerar que ditas manifestacións supoñen un atentado á dignidade e honradez do club", confirmou o Teucro a última hora da xornada a través dun breve comunicado.