Partido duro o que lle espera ao Pontevedra Club de Fútbol en Ferrol, na busca da segunda vitoria da tempada e de deixar atrás definitivamente o seu mal inicio de curso.
Os granates visitan este domingo (17:00 horas, TVG2) o Estadio da Malata e a un Racing de Ferrol que aspira a todo esta campaña co obxectivo de espatantar as pantasmas que perseguen ao equipo fóra da casa. Non en balde os de Luisito non gañan a domicilio desde o pasado mes de marzo (Lealtad), e non o fan tampouco en Ferrol desde a campaña 2009/2010.
A pesar diso no equipo confían en seguir progresando e en poñer as cousas difíciles a un Racing que, aínda que é o equipo menos goleado do grupo e acumula 11 puntos na táboa, xa cedeu unha derrota (Navalcarnero) e un empate (Fabril) no seu campo.
A principal incógnita no Pontevedra é saber quen ocupará o lugar do lesionado Jimmy no lateral zurdo, posto que se disputan David Castro, Bruno Rivada ou mesmo Álex González, que para iso debería atrasar a súa posición natural.
No Racing pola súa banda a principal ausencia segue sendo a do seu goleador Joselu, lesionado. Baixa importante para un Miguel Ángel Tena que agarda "un partido muy intenso, bonito para el espectador" e ante un "rival directo por estar a final de temporada en el play-off", sinalou en declaracións a Ferrol360 o adestrador departamental.
O colexiado do encontro será o cántabro José Alberto Pardeiro Puente.
ESTREA DO SEGUNDO EQUIPAMENTO
Aínda que non existe coincidencia de cores co Racing, o Pontevedra confirmou que estreará en Ferrol o seu segundo equipamento, de cor negro. O club deu a coñecer a imaxe da camiseta este venres a través das súas redes sociais.