O Waterpolo Pontevedra logrou esta fin de semana en Rías do Sur un importante triunfo diante do CN Montjuic e está a un paso de conseguir manterse en Primeira Nacional Feminina.
A falta de tres xornadas para a conclusión da fase pola permanencia, o conxunto pontevedrés ten os deberes case feitos e tan só faríalle falta un punto dos nove que quedan por disputarse para seguir xogando unha tempada máis nunha categoría que cada ano mellora o nivel.
Con todo, a vitoria diante do equipo catalán non foi tarefa sinxela e decidiuse unha vez máis pola mínima, a pesar de que as pupilas de Kike García dominaron o encontro practicamente desde o inicio.
De feito, as vantaxes do Waterpolo Pontevedra oscilou sempre entre un ou dous goles ata despois do descanso, cando Cap púxose o mono de traballo baixo paus e Uxía Ferreira e Valentina Restrepo responderon ampliando a renda en catro tantos (8-4).
A alegría durou pouco ao cadro pontevedrés e mesmo chegou a ver perigar os tres puntos. O CN Montjuic pasoulle por encima no último parcial e comprimiu o resultado ata quedar a un gol do empate (10-9), pero as locais souberon aguantar e lograron facerse finalmente co triunfo por un axustado 12-11.
Consulta as estatísticas nesta ligazón