Nas últimas tempadas o nadal non é sempre agradable para a dirección deportiva do Club Baloncesto Arxil. Hai dúas tempadas a americana Raichel Alison marchaba a un club de Liga Feminina (o Burgos) e nesta tempada, cando todo empezaba a funcionar con tres vitorias consecutivas que situaban o equipo na sétima posición, chega a noticia de que a xogadora Tajay Ashmeade fará efectiva unha clausula que tiña no contrato que lle permite abandonar o club en caso de que un equipo de categoría superior se interesase polos seus servizos.
Aínda que non transcendeu cal é o club que está detrás da oferta á pivot xamaicana, hai indicios que apuntan a que de novo é o Burgos quen se cruza no camiño do club pontevedrés, para levarse á súa xogadora máis determinante e peza clave no equipo de Mayte Méndez.
O representante da xamaicana dirixiuse ao Arxil para facerlle saber que Tajay Ashmeade non se reincorporará ao equipo á finalización das vacacións.
Para o director deportivo arxilista, Lino Vázquez, esta é unha mala noticia para o primeiro equipo, xa que despois dun comezo con titubos, Tajay parecía ter encontrado o equilibrio, achegando rebotes, intimidación e puntos, provocando tamén que as demais compañeiras desen un paso adiante. Lino Vázquez tamén recoñece que se equivocou ao aceptar un contrato con esa cláusula que significa un evidente prexuízo para o equipo, e que non o debe facer no futuro.
Tajay Ashmeade únese á xa larga lista de xogadoras que estiveron no Arxil e fóronse a equipos de Liga Feminina, como son os casos de Candy Navarro, Zora Scravalova, Linnea Lijestrad, Selma Delibasic, Tatiana Gómez Keshler, Daniela Peteva, Zane Jokabsone, Raichel Alison, Valeria Kast e agora a xogadora xamaicana.
Tras encaixar a noticia, os responsables do Arxil, Mayte, Marita e Sam, co mesmo Lino Vázquez, puxéronse a buscar un relevo, coa intención de que a nova xogadora veña a principios do próximo mes de xaneiro, e poida estar xa co resto das xogadoras ao regreso das vacacións, o que lle permitiría debutar ante a afección do Arxil no torneo de nadal, o 4 e 5 de xaneiro, e no derbi ligueiro fronte ao Cortegada, o 11 de xaneiro, en Fontecarmoa.
A busca está centrada nunha pivot de corte moi similar á xamaicana e que se adapte ao presuposto do club, a ser posible comunitaria ou española, descartando nun principio que sexa estranxeira.