Os Xogos Europeos seguen dando alegrías ao deporte pontevedrés. A última chegou da man do fútbol praia coa clasificación conseguida este xoves pola Selección Española, da que forma parte a lerezana Andrea Mirón, para as semifinais do campionato.
A Roja asinou un empate a cero co combinado italiano, con vitoria final na quenda de penaltis, que foi suficiente para selar o primeiro posto e o pase á seguinte rolda.
No primeiro partido da fase de grupos, as españolas derrotaran xa por 6-4 a Ucraína, no que dous dos catro tantos nacionais levaron a firma de Andrea Mirón.
A semifinal disputarase este venres pola tarde contra o segundo clasificado do grupo A, que pode ser Portugal ou a anfitrioa Polonia. A final está prevista para o sábado 1 de xullo.