Pontevedra respira fútbol sala coa presenza na cidade da Selección Española Absoluta, que este domingo iniciou na Boa Vila a súa concentración de catro días en Galicia.
O combinado nacional adestrado por José Venancio protagonizou un adestramento de portas abertas no Pavillón Municipal dos Deportes, onde este luns 2 de abril (19:30 horas) medirase á selección de Finlandia nun encontro de carácter amigable.
Antes, ás 11:00 horas repetirá adestramento aberto ao público.
Tras a sesión preparatoria, os xogadores da selección atenderon aos afeccionados e mozos presentes, que puideron gozar vendo de preto aos seus ídolos.
Ademais o Leis Pontevedra preparou unha serie de actividades, paralelas ao adestramento e ao partido e enfocadas cara aos máis pequenos, tales como un taller de pintura, outro globoflexia e de papiroflexia.
No plano deportivo, a convocatoria elaborada polo seleccionador nacional inclúe cambios de última hora, xa que se caeron da lista o porteiro Carlos Barrón (Palma Futsal) e o pívot Álex Yepes (El Pozo Murcia) por lesión, entrando no seu lugar Fabio Alvira (El Pozo Murcia) e Rafa Usín (Osasuna Magna).