Non puido ser. Acudían á cita sen presión ante un dos favoritos ao triunfo final, o La Salle Tenerife, e víronse claramente superadas.
O equipo infantil do Arxil despediuse en oitavos de final do Campionato de España Infantil de baloncesto que se está a xogar en Pontevedra tras caer por un contundente 33-74.
No medio dun grande ambiente nas bancadas do Centro Galego de Tecnificación, as rapazas adestradas por Marita Janeiro víronse penalizadas pola súa falta de acerto en ataque e os problemas para defender algunha das xogadoras canarias.
O partido quedou encarrilado tras o primeiro cuarto (8-20) e sentenciado ao descanso (21-42), sen que as verdes puidesen pensar en ningún momento na remontada.
A derrota non embaza o bo papel das anfitrionas nun campionato que continúa o seu desenvolvemento entrando na súa fase decisiva.