Bo papel dos padexeiros do Piragüismo Poio no segundo selectivo de augas tranquilas celebrado no encoro asturiano de Trasona.
Alí competiron Adrián Sieiro e Jacobo Lores, gañando o dereito a participar no próximo Campionato de Europa Absoluto na distancia de C-2 200, na que se impuxeron aos baleares Sete Benavides e Tony Segura.
Nas modalidades individuais tamén destacou Sieiro, aínda que neste caso se viu superado por Benavides nas dúas quendas do C-1 200. O balear levouse a praza para o Europeo de Milán, primeiro preolímpico, mentres o padexeiro pontevedrés foi segundo superando outros cinco deportistas para clasificarse para a Copa do Mundo de Portugal.
En distancia non olímpica, o C-1 500, o posto de honra para o Campionato de Europa si correspondeu ao piragüista do Poio, por diante de Rogelio Figueiras.
Tras lograr clasificarse agora comeza outra carreira para os padexeiros galegos, a do financiamento, xa que deberán custearse a viaxe a Milán.