A expulsión de Alberto Gil contra o Lugo trouxo cola durante toda a semana no Pontevedra Club de Fútbol.
Tras a defensa realizada en público até en dúas ocasións por Rubén Domínguez, e despois confirmarse un castigo de dous partidos de suspensión, finalmente o propio futbolista granate pronunciouse sobre unha situación que ve inxusta.
Fíxoo cunha publicación nas súas redes sociais, concretamente nunha historia de Instagram.
Nela afirma que lle impuxeron "dous partidos de sanción por non dicir nin facer nada".
Gil viu a vermella directa, segundo a explicación da acta arbitral, por protestar desde o banco e dicir supostamente "Isto é unha vergoña!". Un extremo que desmente con rotundidade.
"Se cometese o erro de dicir o que pon a acta asumiríao, pero non é verdade e tense que saber", defende.
O futbolista conclúe a súa publicación asegurando que "alguén tiña que pagar os pratos rotos" e pedindo "máximo respecto sempre, pero tamén para nós".
Debido ao castigo que lle impuxo o Xuíz de Competición, Alberto Gil perderá o duelo deste próximo sábado na casa de Osasuna Promesas e tamén o choque fronte a Unionistas en Pasarón.
Engade Pontevedra Viva como fonte preferida de Google de balde
Mantente informado coas últimas noticias de actualidade.