Sobre a bucina. Así chegaron as dúas últimas fichaxes do Pontevedra CF para afrontar o seu regreso á Primeira RFEF.
O club granate pechou o seu plantel cos dianteiros Álex Compa e João Resende.
Pasadas as doce da noite, o conxunto pontevedrés confirmou estas dúas novas incorporacións, que se suman á do tamén dianteiro Marcos Denia, cuxa cesión tamén se concretou este luns.
Compa (21 anos) e Resende (22 anos) ocuparán ficha sub23.
O primeiro deles, natural de Pontecesures e formado na canteira do RC Celta de Vigo, chega ao Pontevedra tras asinar unha sobresaliente tempada no Arosa SC.
Na campaña 24-25, anotou 16 tantos.
A pesar da súa mocidade, Álex Compa xa ten experiencia na Segunda RFEF, categoría na que xogou nas filas de Cartaxena B e UD Logroñés.
João Resende, pola súa banda, chega a Pasarón cedido do Estrela Amadora, equipo da Primeira División portuguesa, aínda que non chegou a debutar con el.
Foi internacional coas categorías inferiores da selección de Portugal e na tempada 24-25 xogou na União Leiria de Segunda División, coa que anotou tres goles.