A prestixiosa e esixente Regata Internacional do Río Negro, en Arxentina, ten este ano máis acento pontevedrés que nunca grazas ao protagonismo de Álvaro Fernández Fiuza e ao tudense Iván Alonso.
A parella galega lidera a clasificación xeral do K-2 despois das tres primeiras etapas, das sete que compoñen a súa 43 edición.
Fiuza e Alonso gañaron as tres etapas, incluída unha segunda que foi a máis longa da presente edición con case 60 quilómetros de percorrido desde Paso Cordova a Vila Regina, e na que investiron 2 horas 53 minutos e 10 segundos de esforzo.
Pese ao dominio, a regata non está nin moito menos decidida, xa que na clasificación xeral os locais Sebastián Vergauven e Sebastián Jocano están a só 4 segundos, ao chegar pegados en cada unha das xornadas, mentres que o arxentino Julián Algañaraz e o húngaro Adrian Boros perderon 6 escasos segundos.
Tras o día de descanso programado para este martes, a Regata Internacional do Río Negro de piragüismo maratón retomará a súa actividade este mércores coa etapa 4 que conectará o Establecemento Don Andrés con Xeneral Conesa.