Gran éxito para o taekwondo marinense e galego o que conseguiu Ángela Balado no Campionato do Mundo Cadete de Fujairah, nos Emiratos Árabes.
A deportista do Mat's de Marín colgou a medalla de bronce despois dunha actuación sobresaliente, na que superou tres roldas.
Balado, que competía no peso de +59 quilos, comezou a competición mundialista gañando a Mattar Mohammed (Arabia Saudita) en dous asaltos.
Na segunda rolda pola súa banda tivo que empregarse a fondo para superar en tres mangas a brasileira Vitoria Sassaki Ferreira.
Así chegou aos cuartos de final, nos que se enfrontou á grega Melina Georgi Kourelou. Ángela superou o reto en dous asaltos para plantarse na semifinal e asegurar medalla mundialista.
Faltaba saber a cor e se lograría chegar ao combate polo título, con todo viuse superada pola croata Loren Opacak, que a apartou da gran final.
Unha derrota por 0-2 que a deixou coa medalla de bronce.
Este resultado en semifinais non evita en todo caso a satisfacción pola súa boa actuación, xa que "corrixín erros que ás veces cometo e continuei traballando até o final", asegurou Ángela Balado en declaracións reproducidas pola Federación Galega de Taekwondo.