Recentemente aterrada en Galicia procedente da cidade húngara de Szeged, na que volveu facer historia con outras dúas medallas de ouro, Antía Jácome inicia un merecido período de vacacións.
"Chego a casa súper contenta porque levo case cinco meses fóra e chegar con catro medallas é un orgullo incrible", dixo a padexeira pontevedresa en pleno aeroporto ante as cámaras do programa En Xogo da TVG.
O peche de campaña da piragüista non pode cualificarse con outro adxectivo que non sexa o de espectacular. No mundial sub 23 da pasada fin de semana logrou o ouro nas modalidades de C1-200 e C2-500 mixto co tamén pontevedrés Noel Domínguez.
Unha xesta que alcanza unha dimensión aínda maior ao lembrar que, hai menos dun mes no europeo absoluto de Munich, colgábase o ouro na súa especialidade, o C1-200 e a prata no C2-200 feminino.
Aínda que agora toca descansar, Jácome é incapaz de sacar da súa mente o principal obxectivo do próximo curso, que pasa por lograr a clasificación para París 2024, os que serían os seus segundos Xogos Olímpicos despois do debut o pasado verán en Tokio. "Vou loitar por estar en París, iso seguro", afirma a deportista da EP Ciudad de Pontevedra.
Á prometedora piragüista lerezana parece favorecerlle aínda máis o cambio de cidade e de adestrador. Deixou Sevilla para iniciar unha nova aventura en Mallorca e os resultados están a ser inmellorables. "Este ano cambiei de adestrador, agora adestro en Mallorca é un sitio incrible e espero seguir todo o camiño con eles", remata satisfeita e esperanzada en seguir facendo historia.
Está de volta a pontevedresa Antía Jácome @antiajacc
— En Xogo tvG2 (@EnXogo_tvG2) September 6, 2022
Acaba de conseguir dúas medallas de ouro nos Campionatos do Mundo sub-23 celebrados en Hungría e confirma a súa progresión
"Estou moi contenta. Este ano cambiei de adestrador. Vou loitar por estra en Paris " pic.twitter.com/6Uq1DQkSS3