Chega a competición máis importante da tempada para a Sociedad Gimnástica de Pontevedra, a División de Honra de atletismo na que o seu equipo masculino participa por décimo ano consecutivo.
O Polideportivo José Caballero da localidade madrileña de Alcobendas será escenario este sábado da primeira xornada da competición, á que o club pontevedrés chega co obxectivo de pelexar pola segunda praza do seu grupo pero con dúbidas en relación ao equipo co que formará.
As lesións son a principal preocupación para os técnicos da Gimnástica, xa que tres atletas chamados a pelexar polos postos de honra nas súas probas como Julián Ortiz, Emilio Martín e Eduardo Gallardo arrastran problemas físicos e ata o último momento non se saberá se poderán participar.
Salvando estas dúbidas, o equipo que se desprazará a Madrid compoñerano: Alberto Guerrero, Alberto Salcedo, Alejandro Otón, Alex Flórez, Alexandre Solla, Ángel Vargas, Darío Costas, David Ferrer, David Martínez, David Veiga, Enric Obiol, Fernando Rial, Gonzalo Sánchez, Ignacio Sarmiento, Iván Blanco, Iván Docampo, Javier Guzmán, Jon Alonso, José Manuel Vila, Juan Manuel Barbosa, Lysvanys Pérez, Manuel Castellanos, Manuel Molinos, Mario Álvarez, Roberto Tello, Rubén Diz, Santiago Ferrer, Sergio Paredes, Víctor Gallego e Víctor José García.
Como rivais a Gimnástica terá nesta primeira xornada ao potente AD Marathon madrileño, terceiro na clasificación final das tres últimas tempadas, o Unicaja Jaén e o Vino Toro Zamora, a priori o rival con menos potencial ao tratarse dun recentemente ascendido.
O principal obxectivo dos pontevedreses será de novo lograr a permanencia, coa aspiración de tentar colocarse entre os oito mellores equipos e entrar na final polo título. O seu mellor resultado histórico é o cuarto posto do ano 2011.