Esixente exame para o Club Baloncesto Arxil na última xornada do ano na Liga Feminina 2, recibindo este sábado (19:30 horas) ao GDKO Ibaizabal, colíder da competición.
As verdes buscarán o seu sexto triunfo consecutivo para ascender aos catro primeiros postos e demostrar que poden loitar ata final de tempada por un posto na fase de ascenso.
Para iso deberán superar a un conxunto, o Ibaizabal, que só perdeu un encontro en 11 xornadas e que conta coa xogadora máis desiquilibrante da liga.
Por aí pasará unha das claves do choque, a defensa sobre a estadounidense Margaret Roundtree, ala-pívot que promedia 19,7 puntos por partido, 11,4 rebotes e 29,39 de valoración.