Non serán moitas as incorporacións estivais no Pontevedra Club de Fútbol, polo menos en comparación co acontecido nos últimos anos.
Finalizada a rolda de contactos entre o director deportivo, Milo Abelleira, e os futbolistas que o club pretendía reter, son 11 os xogadores que se comprometeron a continuar na disciplina granate, dous os que soben dende o filial, concretamente Emilio e Diego González, e sete as baixas confirmadas, dúas delas ao rexeitar Javi Pazos e Pacheco a proposta da entidade lerezana.
Os únicos xogadores que aínda non deron a súa resposta definitiva son o gardameta Lorenzo Riveiro e o interior zurdo David Pérez.
Aos 13 que confirmaron a súa continuidade hai que sumarlles ademais o que polo momento é a única fichaxe, o centrocampista Javi Otero, e a contratación Nando como adestrador do primeiro equipo.
Con estes datos a composición do Pontevedra Club de Fútbol 2013/2014 queda provisionalmente do seguinte xeito:
Porteiros: Sergio Lloves
Defensas: Adrián Gómez, Pablo González, Yago Vázquez, Caco.
Centrocampistas: Iago Paz, Jacobo, Tubo, Fran Fandiño, Emilio (Pontevedra B), Javi Otero (Betanzos).
Dianteiros: Santi Domínguez, Richi, Diego González (Pontevedra B).
As baixas seguras son as dos comentados Javi Pazos e Pacheco e as de Stefan, Nano, Sestelo, Cristóbal Juncal e Moisés Pereiro.