O equipo xuvenil do Club Waterpolo Pontevedra conseguiu a cuarta praza no Campionato de España de 2ª categoría celebrado na localidade canaria das Palmas.
Seis equipos enfrontáronse en formato de liguiña na que o campión se clasificaba para o Nacional Xuvenil de 1ª categoría, a disputar a finais de xullo en Terrasa.
Os pontevedreses, que valoran positivamente a súa participación no torneo ao participar cun equipo moi novo, caeron con claridade no seu primeiro partido ante o gran favorito, o CW Navarra (3-17), pero repuxéronse no seu segundo encontro ao vencer ao CW Murcia por un claro 11-3.
Tras este choque o Waterpolo Pontevedra impúxose con máis dificultades ao Lautada UP vasco (6-3).
Estes triunfos daban opcións de pelexar polos primeiros postos, pero os pequenos detalles nos dous partidos restantes pasaron factura aos galegos perdendo ante o Metropole (5-7) e o CW Elx (3-8).
Tras o Nacional Xuvenil, máis da metade do equipo desprázase agora a Murcia para afrontar o último campionato oficial da tempada, o de categoría cadete.