Un total de 60 nadadores do Club Natación Galaico trasladáronse este domingo á localidade de Ponteareas para participar na segunda xornada da liga galega de natación. Tratábase de deportistas das categorías benxamín e alevín.
Nesta xornada nadaron, xunto co Ponteareas -organizador da proba-, o Club Natación Galaico, o Club Natación Vilagarcía, o Club Natación Salnés e o Club Natación Sanxenxo.
Na categoría benxamín nadáronse 50 braza, 100 braza e 50 libres, ademais dos relevos 4 x 50 libres e 4 x 50 costas; mentres que entre os alevíns celebraron as probas de 100 costas, 200 braza e 100 libres, ademais dos relevos 4 x 100 bolboreta.
Os nadadores do Galaico da categoría alevín conseguiron nesta xornada mínimas para poder participar no campionato galego de natación de verán.
Ao finalizar a competición, tivo lugar tamén unha toma de tempos na que se deron cita un total de 70 nadadores de diferentes clubs da provincia, como o Club Natación Redondela, Club Natación Rías Baixas, o Náutico de Vigo, o Club Natación Ponteareas e o Club Natación Galaico.
A intención de todos eles era lograr obter as diferentes marcas mínimas para a asistencia ao Campionato Galego Absoluto de Inverno.