Destacado papel do piragüismo galego no Campionato de España de Pista celebrado o pasado fin de semana no encoro asturiano de Trasona.
O Kayak Tudense logrou o subcampionato por equipos a só 53 puntos do vencedor, mentres o Breogán do Grove foi sexto e o Piragüismo Poio oitavo.
En total sete clubs galegos lograron meterse entre os 20 primeiros da clasificación final entre as 69 entidades participantes.
O papel do Breógán cimentouse na boa actuación de Diego Romero e Tono Campos, primeiros en C-2 1.000, C-2 500 e tamén no C-4 1.000 metros xunto aos seus compañeiros de equipo Miguel Fernández e Adrián Fernández. Diego Romero impúxose ademais no C-1 1.000.
En canto ao Poio, Adrián Sieiro foi o seu padexeiro máis destacado gañando o C-1 500 en categoría sénior nunha serie que contaba, entre outros, con David Cal, que foi quinto.
Entre as demais vitorias Raquel Rodríguez e Jenifer Casal (Ciudad de Pontevedra) lograron subir ao primeiro caixón do podio no C-2 500 metros.