O fútbol pode ser moito máis que un simple deporte.
O Centro Penal da Lama utilízase de feito como un medio para impulsar a reinserción das persoas privadas de liberdade.
Un ano máis, un equipo de internos do penal pontevedrés participou na Fase Autonómica do Torneo Intercentros Penais Copa RFEF 2025, medíndose a equipos de Monterroso, Teixeiro e Bonxe.
A Lama xa sabe o que é gañar este campionato a nivel nacional, e este ano volveu a gañar o dereito a participar na fase nacional.
Fíxoo tras imporse no torneo autonómico celebrado este martes 29 de abril no campo Novo Municipal da Estrada.
O equipo pontevedrés logrou un pleno de puntos ao imporse nos seus tres encontros a Bonxe (3-0), Monterroso (12-0) e Teixeiro (4-1).
O proxecto de formación futbolística en centros penais desenvólvese na actualidade en 40 prisións españolas, e supón a creación de escolas de fútbol e tamén a oferta de cursos de formación en fútbol e fútbol sala, ademais de cursos de iniciación á arbitraxe.
Agora os equipos clasificados na fase autonómica, como o CP da Lama, disputarán unha fase nacional co resto de equipos clasificados divididos en grupos. De seguir avanzando chegarían as semifinais e final, que se disputarán na Ciudad del Fútbol de Las Rozas.
O obxectivo deste programa formativo é, segundo a Real Federación Galega de Fútbol, "a formación integral das persoas privadas de liberdade podendo conseguir a través del os obxectivos de reeducación e reinserción social".