Continuidade na Sociedad Gimnástica de Pontevedra.
Charo Castro seguirá a ser presidenta da veterana entidade deportiva, tras ser reelixida na Asemblea Xeral Extraordinaria de socios celebrada este xoves no CIFP A Xunqueira.
A súa proclamación tratábase practicamente dun trámite, ao ser a única candidatura presentada.
Será o seu terceiro mandato á fronte da Gimnástica, tras asumir a presidencia no ano 2018 e repetir catro anos despois.
Desta forma Castro seguirá como presidenta xusto cando a Gimnástica prepara un momento moi especial, o centenario do club que se celebrará a próxima tempada 2027.
Durante todos estes anos a entidade atlética seguiu organizando con éxito eventos na Boa Vila como o Medio Maratón ou a tradicional San Silvestre.
Ademais mantivo a súa aposta pola formación de atletas desde as súas escolas e competiu cos seus equipos nas ligas nacionais co bloque masculino consolidado en División de Honra e o Feminino na Primeira División.
Xulio Ventín e Santi Ferrer manteranse tamén na directiva da Gimnástica.