Víctor Vázquez 'Churre' empeza a descontar follas do calendario nunha recuperación que será aínda moi longa.
O central granate recibiu a alta hospitalaria tras someterse a unha intervención cirúrxica debido á grave lesión de xeonllo que se produciu no transcurso do partido en Escobedo.
Segundo informa o club pontevedrés, Churre foi operado o martes día 29 no Hospital QuirónSalud Miguel Domínguez polos doutores Barragáns e Costas Pajariño.
Na intervención constatouse a gravidade da lesión, ao comprobar que ademais da rotura completa do lugamento cruzado do seu xeonllo dereito o marinense tamén tiña roto o ligamento lateral externo e afectado o menisco.
"Constatouse diagnóstico previo á intervención e realizouse regularización meniscal externa por rotura do mesmo, implantouse plastia autóloga por rotura completa de ligamento cruzado anterior e realizouse plastia de reforzo externa por rotura de ligamento lateral externo", explica o parte médico oficial feito público polo club granate.
Unha temida doenza coñecida como a 'triada' e que manterá o xogador do Pontevedra de baixa entre seis e oito meses a tenor do sucedido noutros casos similares.
"Non se produciron complicacións cirúrxicas. Confírmase baixa deportiva de longa duración", reza o citado parte médico.
Churre seguirá a partir de agora "tratamento médico e rehabilitador progresivo" coa mente posta en volver canto antes aos terreos de xogo.
Engade Pontevedra Viva como fonte preferida de Google de balde
Mantente informado coas últimas noticias de actualidade.