Susto dos gordos o vivido este mércores polo Team Farto - Kiroot.
O equipo ciclista pontevedrés confirmou que unha das súas corredoras, Violeta Hernández, foi atropelada por un turismo mentres adestraba en Molina de Segura.
A consecuencia do golpe "polo momento confirmouse unha fractura de radio e varias contusións que requiriron de suturas", confirma o Farto.
Avanza tamén que "se están levando a cabo probas a maiores para descartar outro tipo de lesións".
A ciclista yeclana, de 20 anos de idade, rodaba acompañada doutros dous deportistas que tamén resultaron feridos "de diversa consideración", sinala o comunicado feito público polo Farto.
Violeta Hernández recupérase xa no Hospital Morales Meseguer de Murcia, onde permanece ingresada e en compañía da súa familia.
"Á espera de novidades sobre o estado de saúde de Violeta, a súa familia e o equipo están a traballar para pór todos os medios posibles que faciliten a súa pronta recuperación", explica o equipo pontevedrés pedindo que se respecte a intimidade da deportista nun momento tan complicado.