O balonmán volverá ser protagonista no calendario deportivo pontevedrés coa celebración do II Torneo InterPontes, un campionato que busca consolidarse tras completar con éxito a súa primeira edición en 2025.
Para iso participarán no evento dous dos clubs máis prestixiosos a nivel europeo como son o One Veszprém de Hungría e o FC Porto da liga portuguesa. Xunto a eles competirán por segundo ano consecutivo o anfitrión, Club Cisne Balonmán, e o Balonmán Cangas.
O torneo desenvolverase no Pavillón Municipal dos Deportes os días 13 e 14 de agosto e contará con varias novidades respecto da edición inaugural do ano pasado.
En primeiro lugar, a Sociedad Deportiva Teucro únese a esta proposta e formará parte da organización da competición xunto ao outro equipo da cidade, o Cisne. Tal e como explicou o presidente da entidade azul, Carlos García Alén, "desde o primeiro momento que nos xuntamos houbo sintonía e estou orgulloso do papel que fixo o Cisne nas negociacións. Por parte do Teucro puxemos todo pola nosa banda por levar adiante esta iniciativa".
Engadiu, ademais, que "na cancha somos rivais pero na organización deste torneo imos ser colaboradores ao 100% para sacalo adiante e no futuro estou convencido de que vai ser un dos torneos de máximo nivel a nivel europeo".
Finalizou a súa intervención Carlos García Alén coa firme convicción de que "o Torneo InterPontes vai ser un referente a nivel nacional e internacional en breve".
En relación a esta unión, a concelleira de Deportes Anabel Gulías quixo "agradecer publicamente a xenerosidade dos clubs por entenderse, porque non é fácil. Non porque haxa ningún problema entre eles, pero sempre é máis sinxelo facelo un só que tentar porse de acordo e chegar a fusionar diferentes enfoques".
Outra das novidades que está aínda por concretarse é a implantación dun torneo de balonmán 5x5 nas inmediacións do Pavillón Municipal como unha das actividades complementarias na fanzone do InterPontes.
O presidente do Club Cisne Balonmán, Santiago Picallo, explicou na súa intervención que "iso implicaría ter un campo con bancada, ter aos nenos xogando pola mañá e desa maneira aproveitar a sinerxía de que veñan os pais cos nenos tamén ao torneo".
En relación a esta idea afirmou que están "a piques de pechalo" e que tanto o técnico do Teucro, Sergio Carballeira, como o directivo cisneísta, Miguel Monteagudo, "están a traballar coa Federación e esperamos que se poida lograr".
O presidente cisneísta foi claro ao expresar a súa ambición sobre o crecemento do Torneo InterPontes en edicións futuras, explicou que pretenden consolidarse como torneo internacional a nivel europeo e que "un dos grandes obxectivos é ter aquí en pouco tempo ao Barcelona".
Toda a información respecto da compra de entradas, os prezos e demais detalles estarán dispoñibles proximamente nas principais plataformas dos clubs organizadores.