O Club Natación Galaico, desde Pontevedra para o mundo

Pontevedra
08 de novembro 2025

O edificio da Xunta de Galicia en Campolongo foi escenario da gala anual de presentación da tempada de Club Natación Galaico

Gala de presentación da tempada 25-26 do CN Galaico
Gala de presentación da tempada 25-26 do CN Galaico / Cristina Saiz

A tempada deportiva xa comezou e fíxoo con enerxías renovadas no Club Natación Galaico.

Esquecidas as penurias pasadas polo peche da piscina olímpica, a entidade deportiva mostrou a súa fortaleza na xa tradicional gala anual coa que dá a benvida a un novo curso.

O escenario escollido foi o salón de actos do edificio da Xunta Galicia en Campolongo.

Alí fóronse presentando todos e cada unha das categorías do Galaico, cos deportistas acompañados de familiares, amigos e autoridades.

Esta tempada a entidade pontevedresa conta con equipos en categoría prebenxamín, benxamín, alevín, infantil, júnior, sénior e máster.

A xornada completouse coa entrega de 47 recoñecementos ao esforzo e éxito dos nadadores durante a última tempada.

Destacáronse os récords galegos e de club así como os títulos autonómicos e as medallas nacionais conseguidas.

Unha forma de coller enerxías para todo o que está por chegar, citas entre as que destacan as que terán ao propio Galaico como organizador, como o Campionato de España por Federacións Autonómicas categorías Júnior e Infantil de Natación de Inverno previsto para febreiro de 2026 ou a Copa de España de Natación en Augas Abertas.