Este mes de maio presentouse como un dos momentos máis exixentes do ano para o Club Treboada, que se desprazou até Granada para competir no Campionato Nacional Base e no Campionato de España de Ximnasia Acrobática.
A participación das súas ximnastas nas dúas competicións non pasou desapercibida e o club pontevedrés logrou asinar unha destacada actuación que se saldou con varias medallas.
En primeiro lugar desenvolveuse o Campionato Nacional Base, competición que xuntou ás maiores promesas da disciplina e que se saldou con grandes resultados para o Club Treboada.
En concreto destacou a actuación de Rosalía Lorenzo, Maruxa Casas e Martina Maquieira na categoría senior. As ximnastas realizaron un gran campionato e, grazas ao seu dobre pase, alzáronse coa medalla de prata.
Non menos meritorio foi o 12º posto nacional do trío infantil formado por Alba Hernández, Valeria Conde e Helena Méndez; a 17ª posición do trío formado por Aldara Cabaleiro, Alba Veiga e Iria Díaz en categoría cadete; ou o 23º posto de Lara Carril, Daniella Areses e Kayla Suengas.
En canto ao Campionato de España cabe destacar a gran actuación do trío prejunior integrado por Lucía Cima, Laura Pereira e Emma Medrano. As ximnastas do Club Treboada brillaron no exercicio estático para lograr a medalla de prata e rozaron o podio na xornada final ao ritmo de 7 Rings de Ariana Grande.
Doutra banda, a parella cadete formada por Laura Conde e Almo Medrano non puido entrar nas finais a pesar de partir como favorita para logralo debido a un pequeno erro no seu exercicio que impediu a súa clasificación.
Estes resultados, sumados ás seis medallas conseguidas no Campionato Galego celebrado o pasado 25 de abril en Nigrán, confirman o gran momento de forma das deportistas dun Club Treboada que quixo agradecer o esforzo das familias desprazadas até Granada para apoiar ás ximnastas durante toda a competición.
Engade Pontevedra Viva como fonte preferida de Google de balde
Mantente informado coas últimas noticias de actualidade.