Comeza a segunda volta na máxima división do fútbol sala feminino español con todo por decidir para o Poio Pescamar e o Marín Futsal. As conserveiras atópanse fóra dos postos de playoff polo título, mentres que as da Raña, en metade de táboa, teñen ecarrilada a permanencia.
Co obxectivo de seguir avanzando cara ás súas metas, este sábado as vermellas reciben na Seca, a partir das 18.30 horas ao Alcorcón, outro aspirante aos catro postos que dan acceso á pelexa polo título. As de Manu Cossío ocupan a quinta posición, a dous puntos do terceiro e a un do cuarto, aínda que os seus rivais teñen dous e un partido menos xogado respectivamente.
É por iso que as conserveiras teñen cada vez menos marxe de erro se queren lograr o obxectivo de volver meterse na loita polo título e non poden permitirse outro tropezo cun rival directo como ocorreu a semana anterior na visita do Móstoles (2-4).
Máis complicado terano as marinenses, que visitan ao líder Atlético Navalcarnero este sábado ás 17 horas. As madrileñas, que empataron na xornada anterior co Burela, terminaron a primeira volta de competición sen perder nin un só partido. Ademais, este esixente encontro chega no peor momento para as de Raúl Jiménez, que acumulan tres xornadas sen coñecer a vitoria.