A Liga Asobal encara a súa sexta xornada de competición cun Club Cisne Balonmán que mantén as súas boas sensacións pero que non é capaz de baleirar a súa enfermería.
A falta de efectivos castiga aos de Javier Márquez, que este venres afrontarán unha complicada saída ao visitar (21.30 horas) a pista dun dos equipos máis en forma do campionato, o Ciudad Encantada de Cuenca.
O conxunto conquense é terceiro na táboa con 8 puntos e só cedeu esta campaña ante o Barcelona. O resto dos seus partidos os conta por vitorias.
Se xa de seu o reto é esixente, máis o será pola rotación curta dos pontevedreses, que teñen estes días entre algodóns ao portugués André de Moura, a Gualter Furtado e ao porteiro Kilian Ramírez. A eles súmanse as baixas das últimas semanas con Arboleya, Bruno Vázquez, Cavalcanti ou Dani López, xunto a un Marko Ojeda lesionado para toda a tempada.
"Espéranos unha saída moi complicada na que haberá que estar moi pacientes en ataque para tentar conseguir os mínimos oco que nos deixen, e logo en defensa saídas continuas, tentar que non conceten cos seus pivotes e sobre todo pendentes dese complicado lanzamento exterior que teñen", analiza o segundo adestrador do Cisne, Quiños, sobre un Cuenca cuxa aceno de identidade, asegura, é "estar ben en defensa".