O Pontevedra Club de Fútbol esperará "ata o último momento" para saber se poderá contar con Dalisson de cara ao derbi do próximo domingo 3 de decembro fronte ao Compostela en Pasarón (17.00 horas).
O extremo, titular nas 13 xornadas de liga disputadas, pediu o cambio en Covadonga debido a unhas molestias que aínda non desapareceron por completo.
"A realidade é que estivo toda a semana fose do grupo. Tivémolo entre algodóns para ver se chega", recoñeceu a PontevedraViva este venres tras a sesión de traballo o adestrador do equipo, Yago Iglesias.
"É parecida á lesión que tivo anteriormente e que lle permitiu xogar, pero non é unha recaída, son unhas molestias", explica afirmando que o xogador "ten boas sensacións", polo que será determinante ver como se atopa este sábado no último adestramento da semana para decidir se entra finalmente na convocatoria.
É a gran e única incógnita coa que conta Yago, xa que a outra baixa segura por lesión esta semana segue a ser a de Marcos Barbeiro, aínda que a súa recuperación vai por bo camiño e xa empezou a traballar durante a semana na dinámica de grupo.