A tempada é longa e chegará o momento para todos, pero as primeiras xornadas de liga en Primeira RFEF van colocando os xogadores do Pontevedra nunha escala de importancia dentro das preferencias do técnico, Rubén Domínguez.
Até oito futbolistas partiron no once inicial nas tres xornadas disputadas.
Entre eles só dous completaron todos e cada un dos minutos sobre o verde (270), como son o porteiro Raúl Marqueta e o centrocampista Yelko Pino.
Completan a lista co cartel até a data de 'titulares' Miki Bosch, Selma, Alain Ribeiro, Ander Vidorreta, Brais Abelenda e Álex González.
Pola contra, na nómina de xogadores menos utilizados, empezan a albiscarse situacións que non se esperaban a priori á hora de confeccionar o equipo.
Coa estrea contra o Tenerife de Álex Comparada, Marcos Denia e Joao Resende, que gozaron todos eles dalgúns minutos no tramo final do encontro, o número de xogadores do primeiro plantel que non debutou aínda se reduce a tres.
Un deles pode resultar lóxico, ao tratarse de Edu Sousa, e é que o gardameta pasou a un segundo plano relegado por un Marqueta que foi protagonista ademais nos primeiros encontros.
Xunto a el atópanse Miguel Cuesta e Pablo Hervías. O caso deste último é o máis rechamante ao tratarse, a priori, dunha das incorporacións chamadas a ser importantes no equipo polo seu pasado en Primeira e Segunda División e tamén polo rendemento ofrecido durante a pretempada.
Ambos os dous futbolistas estiveron dispoñibles para o técnico nos tres choques disputados até a data, sendo incluídos na convocatoria pero sen chegar a saltar ao terreo de xogo.