A pontevedresa Daniela Suárez foi unha das grandes protagonistas do equipo español de natación artística que se desprazou até a localidade alemá de Múnic para participar no campionato de Europa júnior.
E é que a moza nadadora, que se está abrindo camiño na elite deste deporte a pasos axigantados, regresará a casa con cinco medallas de prata no pescozo.
A primeira chegou xa no arranque deste campionato, o pasado venres, cando Suárez foi segunda na proba de só técnico.
Obtivo unha valoración de 233,7850, só por detrás da rusa Aleksandra Zavialova (246,2701) e por diante da italiana Giulia Ottonello, que pechou o podio con 232,1558.
"Nadou moi ben, moi boas notas. A artística das súas mellores veces, moi contentas", sinalaban desde o staff técnico tras a actuación da pontevedresa.
Tras volver subir ao segundo chanzo do podio como integrante do conxunto español na final técnica por equipos, Daniela Suárez fíxose coa súa terceira prata.
Logrouno, acompañada de Naia Álvarez, na proba de dúo técnico.
A súa brillante actuación catapultounas cara á prata cunha valoración de 280,1200, só por detrás da parella rusa (287,4608). A de Bielorrusia, con 263,9975, levou o bronce.
E a guinda púxoa, este mesmo sábado, coas súas dúas últimas medallas de prata.
O dúo español, formado de novo por Daniela e Naia, quedou en segunda praza na rutina libre. Obtiveron unha valoración de 272.1909 por parte dos xuíces, o que as situou de novo por detrás de Rusia, que chegou a 299.4832. Bielorrusia repetiu en terceira posición.
O mesmo podio repetiuse na rutina libre por equipos, redondeando unha fantástica actuación do conxunto español, no a nadadora pontevedresa brillou con luz propia.