Aínda co recordo fresco do vivido en Rías do Sur durante a Copa do Mundo de Pontevedra, a natación artística pontevedresa recibiu unha grata noticia coa convocatoria de Daniela Suárez para competir coa Selección Española Absoluta.
A deportista do Club Natación Artística Galaico Pontevedra, aínda en idade júnior pero xa en dinámica do equipo nacional no CAR de San Cugat, foi seleccionada para representar a España na Superfinal da Copa do Mundo que se disputará entre o 19 e o 21 de xuño, en Toronto, Canadá.
A Real Federación Española de Natación ve nesta proba unha gran oportunidade para Daniela e a súa compañeira no dúo Naia Álvarez (AD Sincro Retiro) de seguir acumulando unha importante experiencia en competicións de alto nivel internacional.
Cabe lembrar que ambas asinaron un gran quinto posto no dúo técnico feminino na Copa do Mundo de Pontevedra, ademais de ser novenas no dúo libre feminino.
Nesta ocasión o combinado español non competirá nas rutinas de equipo.
De feito a súa convocatoria está composta unicamente por tres deportistas, as citadas Daniela Suárez e Naia Álvarez xunto a Paula Marcipar (CN Kallípolis).
Son todas elas deportistas nadas en 2008.
Esta competición serviralles para preparar tamén o próximo Campionato de Europa Júnior que se celebrará a continuación, do 30 de xuño ao 4 de xullo en Múnic.