O presidente da Deputación de Pontevedra, Luís López, presentou esta semana no pavillón Príncipe Felipe o programa 'O Noso Club', unha iniciativa pioneira que reforza a colaboración con clubs e federacións deportivas para promover a actividade física entre os nenos e nenas da provincia.
Ante preto dun centenar de mozos deportistas, dirixentes deportivos e acompañado polos vicepresidentes Luisa Sánchez e Rafa Domínguez, López explicou que este proxecto permitirá a nenos e nenas de entre 6 e 16 anos descubrir e practicar novas disciplinas deportivas de maneira accesible e gratuíta.
"O Noso Club é unha canteira de canteiras", definiu o presidente, quen puxo en valor o compromiso estratéxico da Deputación de achegar o deporte a toda a poboación, sen importar o lugar onde viva.
O programa, que irá da man das federacións galegas, consiste en organizar sesións semanais abertas en colexios, onde as familias poderán inscribir aos seus fillos sen custo a través dun formulario unificado dispoñible pronto na web provincial.
As actividades serán impartidas por técnicos de federacións ou clubs e permitirán que, se un neno ou nena interésase por algunha disciplina, poida formalizar a súa ficha coa entidade deportiva correspondente.
Unha das características que diferenza a 'O Noso Club' das escolas deportivas tradicionais é a gratuidade, a descentralización e a variedade para que os menores coñezan varios deportes sen compromiso nin altas federativas previas. Este modelo busca incentivar a ampliación da base deportiva, ademais de ofrecer unha nova vía para o apoio ás familias no acceso á actividade física.
O programa deu o seu primeiro paso coa participación de deportistas de disciplinas como baloncesto, balonmán, loita, taekwondo, judo, piragüismo, atletismo ou rugby.
Durante o acto de presentación, a vicepresidenta Luisa Sánchez resaltou que se trata dun espazo onde os nenos poden "xogar, gozar, crecer e aprender en compañía, sen importar o seu nivel". Tamén destacaron a importancia da iniciativa os representantes das federacións galegas de baloncesto e taekwondo, Xullo Bernárdez e Noelia Pérez, quen valoraron "a ponte para ampliar a canteira de todo o noso tecido deportivo".
Luís López concluíu lembrando que Pontevedra "é a provincia que impulsa a práctica deportiva, que conta coas mellores instalacións e que acolle as máis importantes competicións, cos mellores deportistas, clubs e federacións. En definitiva, somos a provincia do deporte".