Tomás Abeigón é concelleiro do Partido Popular de Pontevedra, responsable de feito da súa área de deportes, pero ademais é licenciado en INEF e o único xuíz de fisioculturismo de categoría internacional que hai actualmente en España.
Por iso o edil pontevedrés pasará esta semana de defender no Pleno Municipal do luns a elaboración dun plan estartégico para o deporte pontevedrés, a participar un ano máis no certame de Míster Universo.
Abeigón desprazarase ata a localidade inglesa de Birmingham para participar o sábado 29 no prestixioso certame de fisioculturismo, considerado o máis importante do mundo neste deporte, no que será xurado por décimo noveno ano consecutivo.
Organizado pola NABBA, federación na que o concelleiro popular é membro do seu comité executivo, Míster Universo celébrase desde o ano 1948 e contou ao longo da historia con gañadores popularmente coñecidos como os actores Arnold Schwarzenegger, Lou Ferrigno ou Sean Connery.
A representación nacional en Birmingham completarana o seleccionador español e tres atletas amateurs: Carlos Ramos, Miguel Ramírez e Julita Esteban.